Capela de San Marcos

En Igrexafeita tamén se atopa a ermida de Amido, situada ao nordeste da parroquia moi preto do curso alto do río Grande de Xubia. Está dedicada a San Marcos e ata hai relativamente pouco presentaba un estado case ruinoso tras máis de dúas décadas sen celebrar alí ningún tipo de culto.En 2018 botóuselle un novo lousado por medio dun convenio suscrito entre o Concello e o Bispado de Mondoñedo-Ferrol, quen lle cedeu ao consistorio a propiedade do campo da festa de Igrexafeita a cambio de que asumise as obras de reparación.Non temos datos sobre a antigüidade da capela e mesmo é posible que para a súa construción se aproveitasen materiais procedentes de vestixios anteriores. Iso explicaría, por exemplo, que nunha das súas aristas laterais e a ras do chan se poida ver unha prominente cabeza de serpe ou dragón esculpida en granito que en aparencia non semella ter demasiada relación co resto da edificación. Tamén podería tratarse da cabeza dun león que, nese caso, si tería relación, posto que este animal é o que se vencella na tradición cristiá coa figura de San Marcos.